Har akkurat no ein kunde som bad meg om å gjera ein jobb for dei. Eg foreslo ein pris, dei godtok den, og noko av det første dei sa på telefon var «Det er ikkje viktig for oss med kontrakt og sånt, så med mindre du har veldig stort behov for det tar vi det muntleg». Ok, tenkte eg, det er ikkje snakk om ein SÅ stor jobb, så vi kan sikkert klare oss utan.

Når jobben var levert viste det seg at den jobben dei faktisk ville at eg skulle gjera var dobbelt så stor som det dei hadde bedt meg om å gjera. Eg hadde gjort grunnarbeidet og gjekk ut frå at dei hadde tenkt å ta vidareutviklinga sjølv, dei ville at eg skulle gjera absolutt alt.

«Ok», svarte eg, «men då skal eg ha meir pengar, OG eg vil ha ein kontrakt slik at vi unngår at slike misforståingar skjer igjen.» Eg skreiv og sendte over ein kontrakt, og klarte å få den signert i retur.

I dag fekk eg e-post frå ein annan person i same organisasjon, som etterlyste materialet og sa at dei måtte ha det seinast i morgon. Gliset var stort rundt munnen min då eg innleia svar-e-posten med at nei, det kunne dei ikkje få, då eg har ein kontrakt som seier at ting ikkje treng å vera ferdig før til helga.

Kontrakten er ei heilt nødvendig livline for meg no. Det er ingenting som er så godt som å ha eit konkret papir der det kjem fram klart og tydeleg nøyaktig kva eg skal gjera, når det skal vera levert, og kva eg skal ha betalt for dette.